raiot.in
Ka jing leh beijot da 2 ngut ki riewniam Katholik ha #Shillong #MeToo » RAIOT
Ki Nongeh beijot ia ka doh bad longrynnieng jong nga: 1.U (Br.) Francis Gale (uba la tip ruh kum u Frank Gale) uba dei jong ka Christian Brothers, St Edmunds Shillong. 2. (Br.) Muscat, Don Bosco, Laitumkhrah, Shillong (ka tnat shon kot) Lai snem mynshuwa, ha ka rta kaba 37, nga shim ka rai kut ba nga dei ban wad jingiarap na ki nongiasyllok kiba la pyntbit ha ka kam bad nga shem ia ka nongiasyllok kaba paka bad ba phylla shisha. Lyngba bun tylli ki bnai jong ka jingiasyllok ka la don kawei ka khep kaba nga shem bad mad ba la weng noh shi syndon ia u mawbah mawsan uba la ban khia halor ka met bad mynsiem jong nga naduh ba nga dang dap 5 snem ka rta. Kaei ba kata ka nongiasyllok ka ong ia nga ha kata ka khyllipmat ba ma nga ka khynnah kaba wan na ka longiing longsem kaba kynrum kynram bad ba duk bad ba la shu ieh noh marwei ban iada ia la ka longrynnieng bad ka doh nga long iba suk ban shah bam klep bad shah leh bein ha kum kine ki riew sniew. Hoid kum kaba la san nga tip shai ba kam dei ka jingbakla jong nga, pynban ka long kaba eh ban ym kynnoh ia lade. Hynrei kaei kaba ka nongiasyllok ka ong ia nga ha kata ka sngi ha kata ka khep ka la jubab ia ka jingkylli kaba nga la kylli baroh shi katta “balei”? Balei ia nga? bad ka jingiasyllok ka la pyntngen ia nga namar ba nga la shem ia ka jubab. Ka la long ka jingiaid lynti kaba jlan bad kan nang jrong ka lynti bad nga dei ban skhem ka jingmut bad kum ka briew kaba la shah leh be ijot ha ki rta 5 haduh 12 snem nga dei ban bat ia la ka jong ka jingtip briew.