travel.meethk.com
[東武鐵道 Tobu Railway] 日光住宿:歷史感十足!特色酒店大公開!
想了解日光嘅歷史同文化,唔一定要去到博物館。哩到有2間充滿歷史氣色嘅酒店,大家入住期間或多或少可能都會對日光有另一番了解!就等小編一一介紹俾大家啦! 住進文化遺產 現存嘅日光金谷酒店於1893建成,是日本第一間西式酒店。係哩間酒店出現之前,日本並無長期度假嘅概念,亦都冇提供西方菜餚嘅酒店,第一間瞓大床嘅酒店就係日光金谷啦!1873年,喺東照宮擔任樂師嘅金谷善一郎為咗招待美國人嘅恩師,而將自住宅邸嘅一部分改建成為外國人而設嘅住宅設施,及後更曾招待愛因斯坦及海倫凱勒等名人架! 日光金谷酒店嘅位置鄰近當地最著名嘅景點二社一寺,交通方便。推開正門嘅旋轉門,現時嘅日光金谷酒店仍保留昔日嘅氣派,而且歷史為建築物加上故事趣味,例如喺1935年前本館一直都係建於斜路上、有露台嘅兩層建築,至翌年先再往下加建,從下加建一層,亦加建咗具「隱藏的大人空間」感覺嘅酒吧,可品味逾200款單一麥芽威士忌,超值得去感受下呀!創業者曾經喺東照宮工作,令日光金谷酒店亦有不少雕刻,與日光東照宮互有聯繫。而且哩到所用嘅陶器及銀器,唔少都係喺大正中期至二戰前期間製作並保留至今嘅特注訂造品,喺哩到記得記得要試下已經有100年以上歷史嘅傳統名菜「金谷風日光香煎虹鱒」。 日光金谷酒店 地址:栃木県日光市上鉢石町1300番地 網址:http://www.kanayahotel.co.jp/nkh/ 湖畔溫泉別莊 位於中禪寺湖畔嘅中禪寺金谷酒店,座落喺奧日光嘅大自然之中,隱身喺奧日光嘅杉樹同群山包圍下,圓木構成嘅外觀好似歐美小木屋嘅放大版,充滿度假氣氛。喺哩度既可盡享奧日光嘅大自然,更可隨時參加自然導賞團、喺中禪寺湖進行划獨木舟同站立式划漿SUP等,秋天賞楓,冬天滑雪,係喺奧日光活動嘅最佳據點。喺溫泉露天風呂「空風呂」抬眼可以睇到滿天繁星,邊享受由12公里外嘅的奧日光湯元引水入嚟嘅乳白色硫黃泉。 除咗住宿,中禪寺金谷溫泉亦有提供日歸溫泉,一場嚟到到絕對唔可以錯過著名嘅「百年咖哩」呀!聽講係喺日光金谷酒店130年紀念嘅時候,將哩道一時失傳嘅名菜重現,充滿椰香嘅牛肉咖哩真係超美味! 中禪寺金谷酒店 地址:栃木県日光市中宮祠2482番地 網址:http://www.kanayahotel.co.jp/ckh/ 日光交通資訊 睇完介紹,想知點樣去?就等小編話你知! 由東武淺草站乘搭特急電車至東武日光站,車程約2小時。 海外旅客仲可以喺東武淺草站旅客中心購買「日光世界遺產區域周遊券 NIKKO PASS world heritage area」(2日) 或「日光廣域周遊券 NIKKO PASS all area」(4日) 一票包括淺草至日光來回車票(憑周遊券特急收費可享8折優惠) 、鐵道及巴士指定區間車票(廣域券包括免費乘坐空中纜車及遊覽船),兼享指定淺草嘅手信店及日光地區嘅遊樂設施嘅折扣優惠架! 詳情請參閱:http://www.tobu.co.jp/foreign/tcn/pass/all.html