travel.meethk.com
[東武鐵道 Tobu Railway] 蒸氣火車大樹!點都要坐一次!不一樣的火車之旅!
無論係唔係火車迷都好,每次plan行程嘅時候見到有蒸氣火車,都會心動想去坐一次!你係咪都有同感呢?係就要留意小編今次介紹啦! 栃木縣嘅SL大樹相對其他蒸汽火車嚟講比較「年輕」,但約35分鐘嘅行走時間最適合大家觀光之用,而且只能喺車上睇到嘅風光真心非常之難忘! SL之回歸 關於SL大樹,故事要追溯到70幾年前,東武矢板線沿線上行走嘅蒸氣火車擁有「Poppo汽車」係好可愛嘅暱稱~可惜隨住1966年矢板線嘅廢線及各種原因,鬼怒川沿線行走蒸氣火車嘅歷史亦暫告一段落。近年,東武鐵道喺下今市站內發現蒸氣火車專用嘅「轉車台」結構成為契機,重新研究SL復活嘅可能性,而開始從各大鐵路公司「招兵買馬」,得以令蒸氣火車喺2017年夏天重現鬼怒川沿線。 SL大樹行走於下今市站及鬼怒川溫泉站之間,全長約12.4公里,利用兩款日光周遊券均可加購指定席券乘搭。蒸氣火車頭C11-207係1941年出品,現役時及由2000年開始一直喺北海道行走,更曾經係「SL冬之濕原號」嘅一份子。 C11-207作為SL大樹嚟到栃木縣,以周末為主提供來回各3趟車程,當中出現喺轉車台時,更係遊客及鐵路迷最佳打卡位!喺月台上可見進站時嘅英姿,約35分鐘嘅車程內可享受附有小鐵鏟造型湯匙嘅「SL大樹便當」,仲可以影即影即有留念添!同時亦都可以購買SL大樹相關嘅紀念品架!坐車嘅時候記得睇下窗外風景,喺杉並木隧道、農田和河川外,仲不時會見到當地人放低手邊工作向列車揮手,人同鐵道嘅連繫可能就係最美麗嘅風景~ SL大樹 地址:下今市站~鬼怒川溫泉站 網址:http://www.tobu.co.jp/sl/ 日光交通資訊 睇完介紹,想知點樣去?就等小編話你知! 由東武淺草站乘搭特急電車至東武日光站,車程約2小時。 海外旅客仲可以喺東武淺草站旅客中心購買「日光世界遺產區域周遊券 NIKKO PASS world heritage area」(2日) 或「日光廣域周遊券 NIKKO PASS all area」(4日) 一票包括淺草至日光來回車票 (憑周遊券特急收費可享8折優惠) 、鐵道及巴士指定區間車票(廣域券包括免費乘坐空中纜車及遊覽船),兼享指定淺草嘅手信店及日光地區嘅遊樂設施嘅折扣優惠架! 詳情請參閱:http://www.tobu.co.jp/foreign/tcn/pass/all.html