الملحمة (زينب -الطحان)
لو كاره التمثيل اقفل من الاول لو شفت فيا جميل ف انا لسه هتحول هو التراك دا طويل ولا التراك طول انى اراك بتميل و انا روحى بتنمل انا ابن هذا الجيل يا قتيل يا متسول هو التراك دا طويل و لا التراك طول! / الساعه تلاته بالليل ف طلعت حرب كنت تقريبا زى ما كنت .. كنتي طالل عليكي بغنوه من قلبي و انا قلبي بلكونتي ماقدرش .. مايصحش اتعشم ف نشوة نصر تانيه ماقدرش غيابك رابع بينالتي يضيع ف نفس الماتش / الوقت اتأخر دلوقتى انسب وقت تتمشى فيه عند المدافن و تطل على ألواح الرخام تحت الاسامي من بين فروق البوابات الحديد القديمه و تبتسم مش لان مافيش راجل بيعيط لأ.. لأ لانك لو عيطت فيه ناس ف قلبك مابتعرفش تعوم ملهاش ذنب و دا مايرضيش ربنا و لا يرضيكي يا زينب / لو قربنا مـ الشمس هنتحرق يا علي و لو وقفنا ف الضل هنبرد و هنختفي لو وقفنا ف المسافات انا عارف انت ماكنتيش عاوزه تموتي ولا عاوزه الباقى سنيني شقى كنتى عاوزه تبقى ف حلاوة سعاد حسنى و جسم هند رستم ف تحِلي من على حبل المشنقه / بتصحي كأن الشمس مستنيه تاخد إذن و بتغني كأن الناس كلها حلوه ماحدش غيره يعرف عن دموع الحضن ماحدش غيري يعرف حاجه عن عِلوه بس انتِ حلوه إِنتِ أحلى من شقوق الحيطه ف البيت القديم و لو ع التخن ف عادي يعنى كلها شهرين ريجيم صندوق ندور فاضي ، مشقوق بلا تصنيف مانتاش ولي راضي ، مانتاش “علي الحريف ” بقى كل دا عادي و بتبتسم يا خريف صادقه بانفعالات ادرينالين مش لوح ازاز بسيطه و واضحه و مبتلجأيش للمجاز يعنى مثلاً .. مثلاً مين دا يا زينب؟! تبصي للصوره و تبتسمي وتقوليلي : “واحد كان بيحبني” و تقلبي البرواز / عِدي الجمايل يا حبيبتي و اذكرينى حينما تضرب عينيكي ف السما و تحسى بالوحده بتطيري العصافير و تطيري وياهم و تدمعي ف حزنهم و تغني ف غناهم يصبح لقاكي مصير للى بيهواهم و اللى بيهوى الهرب يا طيبه يا زينب / إطمن .. إطمن بقيت كويس، خلاص، بقيت عادي هبقى احسن، بعد فتره مش بعيده هستثمر الذكريات ف الشفقه ع النفس و بداية علاقات جديدة هاتى شنطة ايدك اخبي الأكل يا عبيطه الحلو مش بالشكل الحر مايعرفش الشفقه و العبد مايفهمش الثورة الدوله ماتعرفش الرحمه والضلمه ماتعرفش ابوها و التوهه متعرفش طريق و العمر بيحصد و بيجرد عصبية عشان وقت البيريود بتداري خوفك ف زعيق / من زمان عاوز اقترح ع الدوله توفير اراضى المدافن و استغلالها مساكن للشباب و محدودي الدخل او استغلالها لدفن نفايات نوويه للقضاء على الشباب و محدودي الدخل المهم يعنى.. يستغلوا الاراضي دى ف حاجه مفيده و كل واحد يدفن اللى يخصوه ف قلبه و اهوا برضوا لما يحب يزورهم تبقى المسافه مش بعيده بس على الله الدولة تسيبنا ف حالنا و ميدخلوش على قلوبنا عشان المشاريع الجديده تحت شعار “ تغيير اللى فات بطريقه تانيه” كنت حكيتلك قبل كده ان بلكونتنا الواسعه فيها سبع كراسي فاضيه بس مع ان اللى ف القلب اكتر من كده بكتير الصداع النصفي اللى بيجى لـ علي بقاله تلات ايام هيفرتك دماغي و السجاير هتفرتك فلوسي ع السنين الحرام! و الكلام هيفرتك الذكريات على القلوب الغريبه ف الزحام مش كنت وفرتك لعيشه انضف من كده زى اللى ف الافلام عينيا مخزن اسئله مهجور عينيكي مخزن اسلحه و ذخاير يمكن لما نبص لبعض تموت الاسئله بالدور لكن هتفضل الأحزان و كنكة البن الفاير ف حاجات ماينفعش تبان عشان كده ربنا خلق الموت و البيوت و الستاير / هعرف اسامحك على كل حاجه على اخر مشهد سبتيه يتعاد لبقية العمر و حسرة الحنه على ايد البنات السُمر ووحدة المسلسلات الممله و المانجة اللى انتِ شربتيها مع انى كسبتك ف الطاوله و كسر القلب الرخيصه و الرخيص و القهوة اللى لما زعلتك رمتيها على القميص هعرف اسامحك على كل حاجه حتى الغياب! / ﺧﻄﺄ ﻓﺎﺩﺡ ﻭﺧﻮﻑ ﻭﺍﺿﺢ ﻭﻛﺎﻡ ﺫﻛﺮﻯ ﻟﺤﺒﻴﺐ ﺭﺍﻳﺢ ﺧﻄﺄ ﻓﺎﺩﺡ ﻭﺧﻮﻑ ﻭﺍﺿﺢ ﻭﻛﺎﻡ ﺫﻛﺮﻯ ﻟﺤﺒﻴﺐ ﺭﺍﻳﺢ ﺧﻄﺄ ﻓﺎﺩﺡ ﻭﺧﻮﻑ ﻭﺍﺿﺢ ﻭﻛﺎﻡ ﺫﻛﺮﻯ ﻟﺤﺒﻴﺐ ﺭﺍﻳﺢ ﺧﻄﺄ ﻓﺎﺩﺡ ﻭﺧﻮﻑ ﻭﺍﺿﺢ ﻭﻛﺎﻡ ﺫﻛﺮﻯ ﻟﺤﺒﻴﺐ ﺭﺍﻳﺢ ﺧﻄﺄ ﻓﺎﺩﺡ ﻭﺧﻮﻑ ﻭﺍﺿﺢ ﻭﻛﺎﻡ ﺫﻛﺮﻯ ﻟﺤﺒﻴﺐ ﺭﺍﻳﺢ ﺧﻄﺄ ﻓﺎﺩﺡ ﻭﺧﻮﻑ ﻭﺍﺿﺢ ﻭﻛﺎﻡ ﺫﻛﺮﻯ ﻟﺤﺒﻴﺐ ﺭﺍﻳﺢ ﺧﻄﺄ ﻓﺎﺩﺡ ﻭﺧﻮﻑ ﻭﺍﺿﺢ ﻭﻛﺎﻡ ﺫﻛﺮﻯ ﻟﺤﺒﻴﺐ ﺭﺍﻳﺢ / هو التراك دا طويل و لا التراك طوّل! لو شفت فيا جميل ؛ ف انا لسه هتحوّل هو التراك دا طويل و لا التراك طول وسطنيني ف ذكريات هشه وطنيني ف لمسه او رعشه و الطفي بيا ، و ارأفى بيا دا السنين جايه و جايبه بالغيبه والوحشه اصطفيني مـ الجسد و الروح قلبي كان صابح ، صبح مجروح اخطفيني من سطوح لسطوح نبنى نفس العيشه و العشه ولا اقولك هاتى ايدك ؛ قومى نتمشى / انتِ الكسوله ، الطموحه، الغريبه، الكئيبه، المضحكه انتِ العنيده، الشهوانيه، الصوفيه، الجميله، المؤمنه بس عارفه ضحكت امتى؟! لما جه تفكير ف بالى ان ابويا مات كافر لإنه مات موتة ربنا! و إنى ارجع تاني اكتب .. ليكي و ابعت اللى كتبته لبنت كل كام شهرين بتسأل ع الأغانى الممكنه زى كل مره تيجي و تمشى مش مطمنه / أنا آسف .. بس أنا عندي أكتر من عاهه حضن، مابيطمنش حد ، و رجلين مابتلمسش ارض و نفسٍ و ما سواها! كنت عارف بتخبي الحاجات فين البسبوسه تحت السرير و العسليه ف الدرج ارقدي ف سلام يا زينب دلوقتي الكل هيبكي عليكي و يطير الحمام مـ البرج يا ايتها النفس المطمئنه يا ايتها النفس ارجعى إلى ربك و اقطعى فينا الونس و سيبلنا الخرس و الضلمه ف الاوضه / اوضتى اللى شبه الكنيسه او جامع السلطان هاديه هدوء الفريسه ، ضلمه كما النسيان ابدأ طقوسي الرخيصه من غير جرس و ادان و أدين لذاتي الخسيسه بالفضل و العرفان اوقات بكون يحيى قدري ، دكتور طواريء و اوقات بكون عيان! / اخواتى سافروا دا قدري قبرى اتملى غربان بتنامي يا أمى بدرى و افضل انا سهران كلب الحراسه اللى شيلتيه تسع شهور عشان فاكره ان بنوته جايه ، دُفعه دفا و حنان دفعت غلطة مين علشان اكون إنسان رفعت إيدي سنين ، اقبل دُعا السكران لا جدوى مـ الاحزان ، لا جدوى مـ العصيان لا جدوى مـ الإنتظار كان جاب نتيجه زمان / ما بين اول جريه من الدخان عشان حق المظلوم و شهادة الظالم لحد آخر محاولاتك البائسه للتعايش بالفرجه على كاس العالم يا دوب مافيش كأنك كنتِ بتنزلي جرى على السلالم فيه حاجات بتبتدي ف ثانيه و تنتهي ف سنين و حاجات بتاخد سنين و بتنتهي ف ثانيه يا هل ترى يا زحمة الفتارين هتملوا امتى مـ البص ع الدنيا؟! / نفس الشوارع و البشر و الشوف نفس الكلام العادى و المعروف نفس العتاب و الأسف و السف و نفس نفسي بنت دين الـ.. الخوف من مشرحة أهلك لمشرحة الدوله لمشرحة الصحاب و كسرتك بينهم لمشرحة زينهم / حطيلي فروق و تتنسي زى اى ورقه في مهب الريح مجرد شهادة وفاه لأ و كمان ، بيأخروا التصريح شققّت عِمدان الكبارى و لعبت ف اساس البيوت الليله دى كل البشر كل البشر ، لازم تموت / موجوده لسه ف دموع الناس ولا ف الكلام ، ف السمع ولا تحت لوح الرخام كنت بصحيها عشان تروح الشغل يا حسن و انت عارف زينب مبتحبش حد يصحيها لما بتنام طراطيش غُنا بتعيش بعد الحاجات ما تموت و شوارع سموها باسم جثث و قبور بيقولوا عنها بيوت! لما كنت بقولك الموت قريب تضحكي و تقوليلي “خبري قبل خبرك” يا قِلة صبرك يا زينب ، يا قلة صبرك دلوقتي تلاقيكي سكرانه بلُقاه و انا دلوقتي بسكر لوحدى على قبرك كنت بكسر مين مش عارف كنت بخسر إيه مش فاكر عايز اوصل فين مش فارقه و انتِ حلوه ، حلوه جداً هبقى اشوفك كل كاس سرقه كنت صوفي جميل ، بقيت مادي كات كفوفي سبيل ، بقت صحرا سبت خوفي دليل على وعدي سبت شوقى قتيل على الناصيه و الغريبه دمعتك حلوه! الغريبه ضحكتي قاسيه! كسرى البراويز و عديني من ضحايا الحادث المؤسف كنت حلم عزيز لكن ديني لا انول و افضل سنين اوصف كسري البراويز و انا راضي انا عادي في شرعيتي كل شىء غربه في شريعتك كل شىء منصف / هتزعل عليكي القهاوي و تشتاق لك الروايح وتندم عليكي الكراسي الضيقه و كل سواق تاكسي مارضيش يقف لك و تغني ليكي الموالد و يبكي عليكي الشجر و يستثمرك بابليك فيجر / انا الممثل اعرف أأدى اى دور الحب،الزعل،البعد، القرب،الخوف،الحنين و انتَ يا علي ؛ انت الغريب اللي لو جبت جون ف الدنيا دى بيتحسب باتنين زمان كانت بسيطه، بسيطه جداً علشان احضنك كان يدوبك بوّطي اربعين سنتى او تلاتين لو لابسه كعب دلوقتي مفروض اطلع كام سما؟! دلوقتي مفروض اطلع كام سما علشان احضنك يا زينب! / فيه ناس صاحبة قضيه و ناس صاحبة محل و ناس صاحبة مرض و ناس صاحبة مزاج و انا صاحبك يا علي صاحبك .. و دا فيه مـ الإنتماء و المكسب و الخسارة و الإندماج و الإستسلام و الأحتياج مره واحد واحش واحد، بقى واحش واحد واحد ، بقى واحد واحد واحش هدّروش و ألِف عليكي ف الموالد ،و همَّ هيسقطوا عليكي قضيه المرأه او يزهقوا و ينسوكي و يعيدوا فتح ملف داعش / عرفت معنى الخوف ، و عرفت معنى الندم عرفت معنى الشوف ، و عرفت معنى العدم احنا ضيوف ف ضيوف، ماشيين نقدم قدم ،ماشيين نأخر قدم بنردم ع اللى فات و نحفر ما اتردم لسه ضحكتك بريئه ، حتى و انتِ بتحققي المأساه كنت ضعيف عكس ما اتعودتي ضعيف لدرجة انى كنت بدور على اى حد ف الشارع يقولي البقاء لله، كنت ضعيف يا زينب و اللفظ دا بالذات قسوته ف معناه / حفظت ماء وجهك و دلقت ماء وجهي طُلّى على حجرك تِلقي القماش مبلول و تقولي ايه بكاه؟! ما انا كنت جايلك اقول / الله يستهزأ بهم ، الله يستهزأ بنا و يمدهم و يمدنا و مافيش فرار و مافيش بديل اخترتي ليه اصعب طريقه للرحيل؟! يا أمُ العيون المؤمنه انتقلت إلى رحمة الله تعالى أُمال هى كانت فين؟! / إحنا كُنا بعاد و مازلنا إحنا بينا بلاد بتعزلنا كل روح بفؤاد و بهزايم كل ذكرى ميعاد بتخذلنا يبقى إيه ؟؟ نلزم منازلنا / 110 كيلو بيجروا من قنابل الدخان يدورا ع الحق ف ضلمة الاوطان و يرسموا الفراشات جوا القلوب و ع الحيطان بين الامل ف النصر و العصر ف الاحضان من بين شوارع مصر هيبكي الشيخ ريحان هى دى فراشات و لا عقارب هى دى احضان و لا تجارب هو دا الإنسان، لأ دى الآله هى دى الاوطان، لأ دى سفاله هى دى الاحزان ، لأ دى بقاله نقفل الدكان ، ثم نحارب / عِز الطلب موتك ،و الموت مابيعزش هز السما صوتك ، و العرش ماتهزش لو مُت فيه ييجي عشرين بيت هيضلموا اتبسط انوار البيوت كات بيتضايقك لو مُت امك هتزعل اكيد لكن دا افضل بحسابات بسيطة حزنها عليك ، اهون من قلقها و هى نايمه تصحى ماتلاقيش النص كيلو جبنه فيتا لو مُت هتبكي افلام محمد خان و كل مذاهب الدخان و تُمن الرومى ف الدكان و اخر كرسي ف السيما و نسخ مجلات الاهلي القديمه و صور صالح سليم لو مُت هتبكي اغانى التسعينات و تشغل اذاعه القرآن الكريم لو مُت فيه سواق ميكروباص قاهرة/فيوم هيخسر تمانيه جنيه او اكتر عشان هيطلع ناقص نفر ف ميعاد كان جاي و مجيتش معاه عشان تزور قبر ابو إسراء و تشم ريحة عنده ف بتبتسم و تقولها من شابه اباه لو مُت اخواتك مش هيلحقوا الدفنه و على هيشيل النعش لوحده رغم وزنه و انت هتفضل تحبه رغم موتك و هو هيفضل يهنيك رغم حزنه لو مُت مريم هترفض لدرجة انها هتصر تولدك تانى! من غير ما يمسسها بشر غيرك و ساعتها تحضنك براحتها من غير ادب بس للأسف لو مريم ولدتك ، ممكن تطلع يسوع و تتصلب! / لو مُت هتموت ف سلام من غير اذى بس انا عارف هترجع خمس دقايق بس توصي على قهوة على ف العزا زمانك لقيتي شغلانه مش متعبه و مرتب ثابت و حوافز و بدلات عشان كده فضلتي ما هو لو مكنتيش لقيتي كنت رجعتي و كملتى تقديم سي فيهات / العالم همجي و مسعور العالم سلبي متخاذل العالم مأسوي و كداب اساطير و ملامحم و مهازل العالم اقبح خلف الباب يا ترده يا تبدأ تتنازل بيحصد الارواح و يطلق الاشباح لكل قلب جناح ، بينفرد بالموت بننادي بعض نبص و نهادي بعض بونس و نشيل ف بعض جثث في ذمة الملكوت تفصيله واحده تكُر تفاصيل سنين بتمر يغني ليها العمر بعد الأوان ما يفوت املى السكون زحمه املى العيون رحمه و املى عليا شروط السقف مركبه و شراع و ع الحيطه ضلي ف البرواز و دا مش تليفزيون دى ناس بتضحك و تعيط و ترقص من ورا لوح الإزاز اربع كراسي فاضيه ف اوضتي مسميهم باسم اصحابي عشان مش عارف اقعد معاهم و مش عاوز اقعد لوحدي و طفايه بتتملي و تفضي شايله الذكريات و الاغاني و الخوف الخوف الأبدي / بفتكرك كل ما تحيد الطريقه عن الطريق و افرح بدون اذني و كل ما انسى كل شىء و احزن بدون حزني بدون ما القلب الجميل يرجع برىء و يخف بيه وزني و كل ما اخرج سنتي من روحي ولا حد يلاحظني و كل ما ينادي الغريق صاحبه الغريق و يقوله انقذني ، و الميه بتبلع المركب / بفتكرك لاني لما بنساكي بفتكرك ف بتعب بفتكرك ف كل حاجه بتبتدي بعنف و تنتهي بشويش و تعيش و ف كل رمية زهر و ف كل فردة شيش و ف ريحة المحمصه لما تملى جيوبي حشيش و ف كل مره عم سيد يقول ماتفوتنيش و يقطع ف الوريد من غير تفاهم ماتفوتنيش انا وحدى ماتفوتنيش وياهم / بفتكرك كل ما تحمل تويوتا اسكندريه و ألِم اجره و كل ما اهلك و اترمي ف ضل شجره و كل ما يموت منتمي و تعيش متاجره و كل ما بلمح وطن على بابه هجره و كل ما بلمح حديد و ابواب مسوُجره و كل ما تجري السنين .. و العادي يجرى / سقف الاوضه بقى ابعد كتير من سقف طموحاتي ابتسم للدخان و اتقسم نصين فاصل ما بيني جدار واصل ما بينك ضوء ، جسور بالله عليكى يا نور هدي جدار برلين بس انا عارف .. انا عارف عارف يا زينب اعرف ازاي الاحزان بتدوم و ازاي الثورات بتقوم و ازاى الكوابيس بتجيلك و بتصحى مفزوع مـ النوم و ازاي تتعلق بالقشه و ازاي تنساها و تتمشى و ازاى العلاقات الهشه بتطفو ع السطح و الناس فاكرها بتعوم و اعرف عن الغربه و طلعت حرب و غيرة عب وهاب من أم كلثوم و اعرف عن رعشه اللى شايل النعش و راحة اللى متشال فيه و سطوة الحاكم على المحكوم اعرف عن مواعيد الماتشات و عن موديلات العربيات و النضارات و محلات الهدوم ، عن الماكيانات الالمانيه و الشطوط الاسبانيه و الأناقه الفرنسيه و الاكلات الايطاليه و الروايات الانجليزيه و الجبروت الامريكى و المستوطنات الإسرائيليه و عن القاهره و اسكندريه و المنصوره و السويس و شبين الكوم اعرف عن السياسات و الاتفاقات و اسعار الضحايا و تمن الخيانه و ازمة الإنسان اعرف عن الحضارات القديمه عن الهزيمه و السينما اللى فيها كراسي واسعه عشان التخان اعرف عن المخدرات و تأثرها و عن المقدسات و تكسيرها و لحظات الشك و فواتيرها اعرف عن الضلمه و عن الألوان اعرف عن الشوارع و المطبات و الإكشاك و الفقرا و المتشردين و تناحة الدوله و سماحة اسوان اعرف عن البيوت و الموت و اسبابه بس ماعرفش من طرق اجتنابه غير تقليل السجاير و القهوه و الانتظام ف الرياضه و تقليل محاولات الانتحار بقدر الامكان اعرف عن النسيان و عن التجلي و عن التخلي و عن التولّي اعرف عن كل حاجه تقريباً بس ماعرفش بالظبط دى المره الكام اللى بحدف فيها روحي للسما و تجلّي ازاى براحك يساع عيل غبى و مجنون دا انا ماعرفتش افرد دراعي ؛ نظراً لضيق الكون ضلت جميع المساعي ، دلت عيون لعيون مستنى صورتك كأني كاميرا قديمه كأنك نجم أبيض و اسود كأني مونيتور قديم في سينما صيفي منها للسما ، للّطف الخفي مستنى صورتك كأني ورقه مرميه ف ادراج السجل كأني الزمن عز و جل مستنى صورتك و قاعد لوحدي ببتسم و برتجف و برتجل / خالي اللى فيه شبه من محمد صبحى و بالصدفه عنده ولدين و بنتين زى يوميات ونيس بيجى كل يوم اربع يقعد مع امى يشتكوا لبعض الزمن اعزم عليه بسيجاره بس مابشربش قدامه يقوم يدينى عيدية 100 جنيه اجيب بيها كلها علب سجاير و رغم انه ممكن يكون مابيحبنيش بستناه كل يوم اربع بس دى كلها حاجات مش مهمه بالنسبه لى ممكن اولع لو سمحت؟ شكراً .. شكراً استسمحك ف دقيقه كمان احكيلك فيها حاجه انا يا سيدى طول الوقت دا بطلع على سلم كهربا نازل لتحت! / الچينز أحلى عليكى مـ الفستان حاسبي جمالك يجرح المانيكان حاسبي لنظرة تخطف الماشيين و يتوهوا ف عينيكي و يطلبوا النسيان بالله عليكي اضحكي يا زينة .. يا زينب يجوز ضحكتك ، تحيي بالغلط إنسان إهدى خُطى الشفايف لخدودك العنوان كنتِ تحبي الغزل ف هل الغزل مسموح؟! مسموح لحد الآن لو الغزل ممكن يرد الروح هفضل اغازلك يا زينب يمكن تعودي عشر دقايق تجري عليا و تحضنيني ف زهرة البستان / العيال بتسب ف الشارع و الجيران تتخانق ف السابع و الخطيب بيزعق ف الجامع هو دا الواقع .. هو دا الواقع المعارك ضخمه لكن تافهه و الضحايا دمها نشّفها و السما بتهز في كتافها و الرحايا سانه شفايفها العداله تايهه مين شافها العداله تايهه مين شافها الملوك بتـعـرّص ع الشاشه الشيوخ قواده و حشاشه و العساكر عملوا الجلاشه العساكر رجالة الباشا التجارب حزن و مأساه و التعايش صعب يا ولداه و التوحد خوفى و صداه و النهايه سِره و مداه رب روحى التايهه الله اوضه قافله عليا و انا قافل القدر رباك ولد سافل عشت تتكفل و تتكافل السكك ضلمه و الطريق حافل الحشيش فيه كيميا ، بس حشيش خوفت لما وقفت ف التفتيش الشاويش عداني مسألنيش قمت ضاحك ضحكة الدراويش لون عينيكى جميل لكن شاكك ضحكتك تفاصيل بتتعارك سور لقاكى قصير لكن شائك قلت شاء الله و ما شائك ادفنى ف القلب اشواقك / دلوقتى ببص للمروحه و ابتسم انتِ كنتِ شجاعه ماتعلقتيش بحبال دايبه و مابصتيش ف الساعه طلعتي و علقتى نفسك فيها رغبة الموت باستماته بس انا لسه جبان يا زينب اخري بشغلها على تلاته يمكن هو دا الفرق ببساطه فيه روح مابتحتملش تجميل الجروح و روح بيعدي فيها الرصاص من كتر فتحاتها او من كتر إبر الخياطه اشهد بإنك كل يوم بتتطلقي طيفك و تكررى المشهد اشهد بإنك كنتِ طالعه للمجهول كنتِ لسه شايله في قلبك امك و اصحابك و ف شنطتك برفان هديه و ما تيسر من العسليه و الشيكولاته / بنغتسل بالبكا ، و بنمتثل للريح ترمينا ف التهلكه و ف حزن بهو فسيح و ذكريات مُدركه ، وجه الخسارة قبيح نطلع من المعركه ميت ف كتف جريح عاجز ف حضن كسيح نتعصر مـ الألم و ننتصر للعدم مع كل شمعة تسيح يا خالق الأكوان و طالقنا روح و عنان و سايقنا للنسيان سايق عليك النبي المصطفى العدنان إكسر خشب مركبي و الروح تعود بلا عود هذا الجسد قربان
#أحمد_الطحان #ملحمّة_زينب #زينب
