ojakgyo-family

youtube

oja brothers E57 unaired scenes

مزرعة الاوجاكيو ~ اهل الاوجاكيو ~ اخوان الاوجاكيو~ اوجاااكيووووو

طلاسم ؟ تعويذه سحريه؟ لا لا مغير اسم دراما سلمكم الله 

عفوا اقصد ميلودراما..عفوا عفوا اقصد لوف كوميدي..عفوا عفوا عفوا اقصد انسانيه وكل ابو تصنيف اخر في بالكم ..

اول شيء هالبوست عباره عن فضفضه وهذره طويله عن دراما فالي مو مهتم يتخطاه “)

ماعادتي اكتب عن درامات ولااطلع الي بخاطري عنهم بس يخي.. ذي الحاجه قليلة ادب .. واعني مااقوله وش قلة الادب ذي؟ لا جد كيف الكاتب يتجرأ يكتب قصه بها الجمال؟ كيف المخرج يتجرأ يصور بها الاحساس؟ كيف الممثلين يتجرأون يمثلون بها الواقعيه؟ كيييف كل ابوهم يتجرأون يسوون كذا فييني T.T

مالها الا انهم قليلين بل عديمين ادب وحشيمه T_T

يعني حقيقة مؤلمه في حياتي اشوف الدراما الكوريه ولااتوقع منها الكثير.. لااتوقع اكشن سنع ولاتمثيل صاحي ولاقصه مستقيمه ولاسيناريو معتبر .. فيه اشياء جميله نعم بس عادتي مااحط اي توقعات عشان مااتحطم “(

ارجح السبب الاعظم والعيب المستفحل الي يخلي توقعاتي دائما هابطه كهبوط فرصة فوز كرواتيا في مباراة الافتتاح > تشبيه متعوب عليه ض1

السبب يكمن ويتربع في القصه “( انا انسانه مااتأثر بقصص الحب مااش ماعندي ذاك الرومانسيه بس كما تعلمون عندي ابو البرومانسيه > البروذرشيب 

الدرامات الكوريه تدور وتلف عن الحب بكل اشكاله الهندسيه من مثلثات ومربعات لدرجة تلف الراس وتحوم الكبد -_-

فهذا هو السبب في لحظات الكلايماكس في الدراما وبينما الفانز قايم قاعد حول العالم اكون انا منسدحه واشرب حليب فراوله واتثاوب “( 

^ تخيلوا جين سان وهو يقرا الجمب 

لا يعني جديا تبوني اقوم واقعد عشان ام البطل فرقتهم؟ ولاعشان طلع منافس؟ ولاعشان البطله ياحرام فقيره وتكسر الخاطر ؟ اقول مناك بس لو اقوم واقعد كل مره يصير فيها الي سبق كان انكسرت ركبتي وتورمت اقدامي

فعشان كذا اقول عن هالدراما انها شيء قليل ادب “( قليلين الحيا اخيرن جابو لي دراما عائليه صاحيه “( ق1 بالعاده حتى لو فيه شوية برومانس ولاثيم عائلي يكون بسيط جدا مقارنه بالرومانسيه اما هنا لا T.T

يالفرحتييييي ق1ق1 دراما تتكلم عن عايله .. عن اخوان .. مليئه بالبرومانس والبرو تي بي *تبكي بحرقه* 

كما قلت سابقا فيها كل ابو التصنيفات ~ بس بشكل متوازن ومعتدل جدا يعني مااتقدر تقول ميلودراما لا موب لها الدرجه ولاتقدر تقول انها عائليه بحته وساحبه على ابو الرومانسيه لا فيه نسبه ماخذه حقها وماتقدر تقول هاههاهاها كوميديا لا ياابوي بيمغصك بطنك وانت تحاول ماتبكي 

واهم واافضل واطلق شيء.. مافيه شخصيه ملائكيه ولاشخصيه شيطانيه ! اقسم اعجاز علمي “( يعني معقول دراما كوريه والابطال محد منهم شرير ويبي ينتقم! ولا محد منهم طيب وملائكي بس انخدع ويبي ينتقم > الانتقام حاصل حاصل خخخخخخخ 

متعه نادرا احس فيها اني اخذ وقتي في كره ابو الشخصيه وبعد فتره اخذ وقتي في حبها تماما يخي .. جيبولي الكاتب اكيد انه اوسان سنع وصالح وبار بوالديه “(

نتكلم عن الشخصيات 

لحظه القصه القصه ~ الاوجاكيو ذي مزرعه يملكونها عايله تتكون من اب وام وجده واربع عيال فجأه بيوم اكتشفوا انها موب لهم انما لصديق ابوهم وانه مسلفها له 10 سنين وصارت سوالف وبنت هالصديق جت قالت رجعولي المزرعه المسكينه فعلا تحتاجها ولابتعيش في الشارع”( بس هم بعد موب قايلين حاضر ومعطينها لها بها السهوله “( فتصير سوالف والقصه الاساسيه عن هالبنت وكيف تدخل بها العائله

القصص الفرعيه وش كثرها كل واحد من الاخوان عنده قصته وكل وحده تصور جانب انساني وااقعي بشكل يصيح “(

الكوبلات .. توني قلت مااهتم بالرومانسيه بس الكوبلات بها الدراما شيء اخر كلللهم كلللهم بلا استثناء  يخلوني ارغب في تبنيهم

كل واحد من الاخوان الاربعه عنده قصه مع بنت وكل واحد منهم اغبا من الثاني من نواحي مختلفه والبنات عاد شيء ثاني! هذا ثاني اعجاز علمي يصير ومااكره اي بنت من الكاست في دراما كوريه كلهم كيوت بشكل ودي اكفخهم كلهم وازوجهم ض1 

..البرومانس .. العلاقه الاخويه الانسانيه التي على القلوب اجراميه 

اصبرو خل احسب .. اربع اخوان وكل اثنين منهم يشكلون ثنائي قاتل .. عندك ست علاقات في غاية الجمال “( ق1 > ماحسبت الثلاثيات ترا ض1

اكبر اثنين نقيض بعض ض1 بس كل واحد منهم يكمل الثاني يعجبني كيف الثاني كأنه الاكبر وهو راعي المسؤوليه والاكبر محترمه لكذا بس حاسده ومع كذا يثق اكثر شيء فيه والثاني بعد مايثق الا باخوه الكبير اذا تضاربوا طعاامه ام الهياط وحركات فكوووني خخخخخخخ

اصغر اثنين لا ذولا المكافخ الصدقي وياعمري الصغير الضعيف الاخو الثالث شرطي وعصبي والكفه دايما في صالحه والصغيرون بس يتكفخ ض1 بس يستاهل من قاله يستفزه كل دقيقه خخخخخخ

الثاني والثالث خخخخخخ توم وجيري ض1 الثاني صحفي ومن وين مصدره الاخباري؟ من مكتب اخوه الشرطي ههههههههه المجرم يسرق اخبار من التحقيقات وكم مره بغا ينفصل اخوه بسبته بس عاد لاكشفه يروح فيها هذاك ينسا ابو الاحترام والفارق العمري ويركض وراه كأنه يركض ورا مجرم ض1 

واترك العلاقات الباقيه لخيالكم ض1 > تعبت من الثاني والثالث والرابع بس ادري بتعب اكثر لو استخدمت اسماء ض1 

لحظاتهم الاخويه تصيبني بمقتل بمقتل تشنتشااا “( ق1

اعجاز علمي ثالث: الكاست تقريبا كلللهم شايفتلهم درامات جديده يعني انتاجها بعد هالدراما الي كانت في 2011 كل واحد تقريبا شفت له دراما وحده وكان انطباعي الاول .. كرهتهم .. موب عادي وتمثيل ممل لا لا كرهههتم ! وبقدرة قادر حبيتهم كللهم من هالدراما “) 

جو وون 

الاخو الثالث الشرطي وهو البطل 

شفتله اول شيء كاكشيتال 2012 وبعدها دراما السباي مدري البوديقارد 2013 وفي كلا الدورين ماحبيته ابد .. ماكرهته لان تمثيله مافيه عيب وكاكشيتال دراما قويه بكل المقاييس بس برضوا.. ابدن مادخل مزاجي وكان صياحه مزعج بشكل ض1 ولايزال مزعج بس دوره هنا مدري شقول تغيرت نظرتي تماما قعدت اسأل نفسي متى كان هالولد مبدع كذا ؟

الاخو الثاني 

^ ههههههههههههه ينقالك المكنسه ماراح تكشفك ض1

شفته في ماي برينسيس الي كانت بنفس السنه 2011 وياان دوره كان سامج وبثر بشككل اففف بس حقدت عليه دوره كان استاذ تاريخ ومهتم بالهيستوري كيف افسدت هالدور انت ووجهك انت عار ع التاريخ -_- بس هنا .. اتقن دوره بشكل حبيت شخصيته كثير خصوصا كوبله مع الكيوت ذيك احسن كوبل عندي يازينهم ق1

اكثر واحد ضبط دوره امس اشوفله مشهد يضيق الصدر وتنهد فيه بقوه وانخشرت لاني تنهدت معه بدون ادري خخخخخخخ

الاخو الاكبر 

^ صوره تعبر عن شخصيته ض1

هههههههههههههه هذا لاازال متعقده منه شوي ض1 دوره كان النفسيه الشرير المجرم القاتل في اي هير يور فويس انصدمت اشوفه انسان عادي ويعاني من العزوبيه وشخصيته خجوله خخخخخ ماااقدر كل ماضحك بخجل اشوف ابتسامة شر وقتل ض1 بس هالاحاسيس خفت مع الحلقات ودخلت جو مع شخصيته مسكين اكثر واحد متعذب بين الاخوان وعنده عقدة نقص ومن جددد حظه تعيس وين مايروح “( 

الماكني الاصغر ~

شفته في درامتين وين مان لوف وارانغ وياانه كان .. شاقول بس كنت اتغصب على مشاهده وابي اقدمها -_-

بس هنا لا هو اكثر واحد مسوي جو وحركه في الدراما ض1 الكل يذب عليه وهو يذب ع الكل ينضرب ويتكفخ ومايتأدب راعي حريم بس الحرمه الي بيحبها كارهته وبغت تكسر على راسه مزهريه خخخخخخ

له دور كبير اذكاهم واكثر واحد يهتم فيهم يعجبني محارشه مع جوو وون وكيف انه غيران منه لان امه وجدته يهتمون فيه اكثر منه شخصية بزر رغم انه 28 سنه ض1

البطله 

اكبر اعجاز علمي! كنت كارهتها بشكل من دورها في يو ار بيوتفل وترددت كثير اشوف الدراما لعلمي انها البطله بس .. ماهذا !! البنت كيووت لدرجة تنوكل “( ق1

بعد كل ذا الهرج توني باقي لي 18 حلقه ض1 وصلت 40 من 58 > كنت متردده اشوفها عشان عدد الحلقات ذا بس الحين اعتبره احسن شيء في هالدراما ماابي خلصها ياخي ق1

لي ببوست آخر لاخلصتها~