فكرة فقدي لحاجه موجوده دلوقتي دي اراده من ربنا ف تمام.. لكن افقد الماضي!
بختبر اوحش حاجات ممكن حد يعيشها في حياته
بفقد الماضي اللي هو بيشكل الإنسان اصلا ويخليه عايش وقادر
انا كنت بكون مرعوبه ابقى بقول ده ماضي وعدي.. انا دلوقتي بقيت من غير الماضي اللي عدي ده! يعني مبقاش في ماضي اصلا افكر فيه واكون بقول حصل وحصل! بقيت حاجات كلها محصلتش اصلا
كل حاجه حسيتها في يوم من الايام كنت بحسها بوهم وبكذب! كل حاجه بمعنى كل حاجه.. ياالله.
الوصول طلع خدعه فعلا.
لما قرأت الجمله حسيت ان ايه ده! انا اللي مفروض يرعب اي حد ويخوفه انا فيه ووصلته، هل احنا في وسط الحاجه مدركين اللي حاصل! مدركين ان دي ابشع من ابشع الحاجات اللي ممكن خد يتخيلها ويخاف منها اخنا بقينا وسطها!
ابشع كابوس ممكن اكون حتى متخيلتوش في حياتي أن كل حاجه كذب.. كل حاجه كذب..
يارب نجينا من نفسنا وتفكيرنا واهدينا وارشدنا
يارب القوه من عندك علشان كل حاجه كبيره.. كبيره اوي اوي يارب عديها على خير وسلمنا من نفسنا وإلطف بيا بس.. بس اللطف يارب.
اكتر سؤال هربت منه وحسيت انه مينفعش اسأله ومش بتاعي ان اسأله اصلا.. دلوقتي حسيت انه عاوزه اسأله بس مش للقدر ولا النصيب ولا ربنا اكيد لاني انا مين علشان اسأل ليه.. ربنا قدر وربنا عمل ف خلاص ده شئ مفروغ منه كده كده لاني عمري ما هلاقي حد يمشي حياتي احسن من ان يكون ربنا اللي بيمشيها..
بس حسيت لوحدي وانا قاعده وبفكر لوهله ولقيتني بقول
طيب ليه؟ مش ليه بتاعت ليه انا اللي يحصلي ده ابدا.. بس ليه اللي حسيت ان اول حاجه ممكن تطلع اتجاه شخص معين اول مره احس اني عاجزه اني اعبر حتى لنفسي حتى انا حاسه ب ايه وازاي وكل حاجه بسكوت..
اول مره احس اني في حد معين مش عاوزه اوجهله كلام.. علشان هوجه لمين!
بس اول حاجه جات على بالي لمجرد تخيلي
طيب ليه؟
قل إنَّ الأمر كله لله.. قل إنَّ الأمر كله لله..إنَّا إلى الله راجعون.. إنَّا إلى الله راغبون.
كل حاجه بتحصل مترتبه من عند ربنا.. ومفيش احسن من ان يكون ربنا اللي بيرتب حياتنا بس الإدراك صعب وادراك الشئ الغير مرغوب صعب والمواجهه أصعب وأصعب.. لو واجهت نفسك ممكن تنهار وانت متعودتش تنهار اتعودت تحل طول الوقت لغاية ما ايديك تتقطع من الحلول لكن متواجهش ولو مواجهاتهاش متعرفش الموضوع ممكن يخلص على ايه.. المهم ان الرضا موجود وان ربنا موجود وان الحياه اكيد فيها ترتيبات تانيه من ربنا بس لسه مشوفنهاش.. ف يارب هون وإلطف وإلطف وإلطف وإلطف..
من أكبر نعم ربنا ان الواحد يحس ان في حد شايل همه، شايل مسئوليته، خايف عليه وعلى حياته وعلى أحلامه وطموحاته وخايف على مشاعره كمان،خايف يروح منه وخايف يحس احساس وحش، والله دي كلها نعم لا تعد ولا تحصى، فكرة ان الواحد يحس انه في حد في وقت قاعد بس بيفكر فيه وفي حياته وفي انه يعمله ايه يبسطه يريحه يهديه يطمنه.
ان الواحد يحس انه اللي قدامه خايف يخسره دي نعمه كبيره اوي.. ربنا يديمها على اي حد موجوده معاه دلوقتي النعم دي ويعطيها لأي حد نفسه يتطمن بس.
مينفعش تكون حياة الإنسان كلها هروب كده خصوصا لو بيهرب من حياته نفسها مش من موقف مش من شخص مش من حاجه لا دي حياته..
انا مش عاوزه أفهم انا عاوزه البركان اللي جوايا يهدي.
مش عاوزه أفهم ليه انا مش مرتاحه واقعد احط اسباب لنفسي زي كل مره وافصص في اللي بحس به واقول هو ده السبب! طيب اهدي وهتتحل واقعد أصغر من مشاكل نفسي مع انها مش صغيره وجعاني وتعباني ومخلياني مش انا،بس لا مش عاوزه أفهم انا عاوزه اهدي وارتاح واتطمن، من أقل حقوقي اني اتطمن بس.
“"ياربّ، ألهمني أن اطرق بابك كلما غرقت، علمني ألا نجاة إلا بك ولا مَفر منك إلا إليك، اهدني إلى وجهتك واجعلها وجهتي في كُل وقت “”
