حزينة لدرجة أني أريد أن أبكي قلبي، مرهقة لدرجة ألا استطيع البكاء، مشوشة للغاية فلا حتى أستطيع أن أرى يدي أمامي، وأشعر أني لا أملك من أمري شيء

من أسوء المشاعر اللي الإنسان بيمر بيها هي إن نفسه تصعب عليه، إنه يحس إنه بيقدم حب وتقدير وتفهم لكل المشاعر وبيتقابل بأنانية وتفكير ف النفس بس

ديما بنقول اللي بيحبك هيحب أي حاجة تخليك مبسوط، هيخرج برا نفسه وهو عايز منك تكون إيه

هيكون مهتم إنت عايز إيه وهتكون مبسوط ازاي

لكن اللي بيحطلك قيود وشروط في كل خطوة

دا مش بيحبك كفاية .. دا شخص بيحب نفسه اوي وبيطمنها على حسابك .. على حساب سعادتك .. على حساب أمانك

فطول الوقت هتحس بتأنيب الضمير .. وأنت مش عارف ليه .. أنت مش بتأذي حد .. بس بردو حاسس بتأنيب الضمير

وهو مش هيحاول يوقف الشعور دا ..

مع إن اللي بيحبك وقلقان هيكلمك يطمن وبس

لكن فيه اللي قلقان وببحملك نتيجة قلقه في إنك تعيش بشروطه وبس .. وغير كدا فأنت شخص مش كويس

وف الاخر هتصعب عليك نفسك انت عمرك ما اخدت ربع اللي بتقدمه

ولا حب

ولا اهتمام

ولا تفهم

ولا امان

وانت اللي عالم يارب

(وَمَاۤ أَرۡسَلۡنَـٰكَ إِلَّا رَحۡمَةࣰ لِّلۡعَـٰلَمِینَ)

[Surah Al-Anbiya' 107]

رحمة للعالمين كلهم، ليس من آمن فقط

لإن المسلم الحقيقي فهو أمان لكل من حواله، فهو لا يخون ولايظلم ولا يؤذي أحد، مهما كانت دينته وخلفيته

فهي رحمة شاملة، لكل العالمين

من أعظم الحاجات ف الاسلام هي بناء الفرد

فيه تعليمات وخطوات بتحدد أخلاق الفرد في كل المعاملات

فالمسلم الحقيقي بيتشبع بالأخلاق ديه في كل حياته

وتقدر بسهوله جدا تشوف الاسلام في تصرفاته

أنا بقول المسلم الحقيقي لإن الوصول لدا مش سهل

يعني مثلا خلق واحد زي لا تغضب

ممكن الواحد يفضل سنين بيعلم نفسه عدم الغضب والتحكم فيه، إن يكف عن الناس أذى غضبه

ويمكن دا يكون جهاده في الدنيا واختباره

ف يارب أجعلنا مسلمين فعلا

بأخلاق الإسلام الفعليه

واعنا على جهاد أنفسنا

#أفلا_يتدبرون

(كُلُّ نَفۡسࣲ ذَاۤىِٕقَةُ ٱلۡمَوۡتِۗ وَإِنَّمَا تُوَفَّوۡنَ أُجُورَكُمۡ یَوۡمَ ٱلۡقِیَـٰمَةِۖ فَمَن زُحۡزِحَ عَنِ ٱلنَّارِ وَأُدۡخِلَ ٱلۡجَنَّةَ فَقَدۡ فَازَۗ وَمَا ٱلۡحَیَوٰةُ ٱلدُّنۡیَاۤ إِلَّا مَتَـٰعُ ٱلۡغُرُورِ)

[Surah Aal-E-Imran 185]

الأية ديه كانت شغالة بالصدفة في نفس اللحظة اللي بابا كان بينهي رحلته في الدنيا ديه بين إيديا،

يمكن ربنا بعتهالي عشان يواسيني ويطمني على بابا، ويمكن عشان أفتكر إن الدنيا مش مكان يجمعنا، فيه مكان أحسن وأدوم لينا مع بعض

وربنا بيصبرني إن الدنيا مش مكان وفاء للأجور، الدنيا مش عادلة ولا الناس ملائكة، إحنا كلنا بنحاول طول الوقت، والنتيجة مش هنعرفها هنا

طول عمري كنت أول ما أسمعها بقف عند كلمة (زحزح)

قد إيه مش سهل إننا نبعد عن النار ونقرب من الجنة،

قد إيه الموضوع محتاج فعل زي دا يحسسك بالصعوبة والمجهود

وفي وسط كل الحاجات اللي في الدنيا اللي بنتصارع عليها طول الوقت، ربنا بيفكرنا إن مفيش غير فوز واحد بس، وباقي الأشياء مالهاش معنى جنبه

وبنفكر نفسنا ديما إن وما الحيوٰة الدنيا إلا متاع الغرور

الموت غريب،

له ريحة وملمس وصوت، ومش بيتنسى، بتفضل التجربة محفورة جواك، ريحة الموت وإحساسك بيه

إحساسك بالضعف إن كل دا أكبر منك، وإنك مش هتعرف تخلي اللي بتحبهم يفضلوا معاك ثانية كمان،

أنت عاجز ومالكش حول ولا قوة، ولا كلمة بابا خليك معايا ولا دموعك هتفرق

يارب تكون في مكان أحسن يا بابا، أنت تعبت كتير في الدنيا ديه، ربنا يعوضك عن كل لحظة ألم مريت بيها في العالم دا

يارب تكون مبسوط ومرتاح

ويارب تكون عارف أنت قد إيه واحشني

أفلا يتدبرون

هنزل كل يوم أيه نتدبر فيها من واقع حياتنا، نلمس فيها حكمة ورحمة ربنا بينا في كل تفصيله في حياتنا

#أفلا_يتدبرون

اللهم إليك أشكو ضعف قوتي ، وقلة حيلتي ، وهواني على الناس ، أرحم الراحمين ، أنت أرحم الراحمين ، إلى من تكلني ، إلى عدو يتجهمني ، أو إلى قريب ملكته أمري ، إن لم تكن غضبان علي فلا أبالي ، غير أن عافيتك أوسع لي ، أعوذ بنور وجهك الذي أشرقت له الظلمات ، وصلح عليه أمر الدنيا والآخرة ، أن تنزل بي غضبك ، أو تحل علي سخطك ، لك العتبى حتى ترضى ، ولا حول ولا قوة إلا بك